Naslov
Nenia Alovisii Cippici de Petro Riario c. 1474 quae servatur Monachii in codice BSB CLM 716
(A nenia by Alvise Cippico on Petrus Riarius c. 1474, surviving in Munich, in MS BSB CLM 716)

Autori
Jovanović, Neven

Izvornik
Humanistica Lovaniensia (0774-2908) 61 (2012); 241-246

Vrsta, podvrsta i kategorija rada
Radovi u časopisima, članak, znanstveni

Ključne riječi
poesis neo-Latina; editio critica; litterae renatae; elegia
(neo-Latin poetry; critical edition; Renaissance; elegy)

Sažetak
Textus neniae editur. Liber antiquitatum cum epigrammatibus, codex manuscriptus qui ab Hartmanno Schedelio collectus et exaratus erat annis 1502-1505, nunc in Bibliotheca Monacensi sub numero Clm 716 asseruatur. In foliis 130r--132r exhibet codex "Naeniam Alouisii Cippici de clarissimo adolescente Petro Rhiario, Sixti summi pontificis nepote". Nenia scripta est distichis elegiacis, uersibus 124 ; exemplar in codice Schedeliano unicum est adhuc nobis notum. Petrus Riarius Italice Piero Riario, a. 1445 natus est Savone in oppido Liguriae, ubi ineunte pubere aetate habitum diui Francisci suscepit a. 1459. Multis deinde in locis studuit, Papiae Patauii, Venetiis Bononiae, Perusiae Senis Ferrariae ; Romae tandem theologiae studiorum curriculum peregit. A. 1471 a Sixto quarto pontifice maximo, auunculo suo, factus erat cardinalis sancti Sixti ; eodem anno, priusquam cardinalis crearetur, breui tempore Patauii docuerat, officio lectoris publici Ordinis Fratrum Minorum Conuentualium functus cf. infra in textu carminis u. 19-21. Paucis post annis in cardinalatu mortuus est, tertio mensis Ianuarii a. 1474 ; diem obiit post reditum in Vrbem, quamuis auctor neniae eum alibi, in "terra Picentum" et "ignota humo", in ipso reditu fata peregisse putare uideatur cf. infra u. 18, 27-28. Et tumuli honorem Riario alibi datum auctor noster existimat cf. u. 105-110, cum supersit usque ad hodiernum diem Romae sepulchrum cardinalis splendidissimum in basilica Sanctorum Duodecim Apostolorum. Auctor autem neniae de Riario, Alouisius Cippicus nomine Croatice Ludovik Cipiko, natus est Tragurii in Dalmatia, die 16. mensis Septembris anno 1456, genere nobili. Pater fuit Coriolanus ille Cippicus seu Cepio qui bello nauali Venetorum cum Othomano in Asia annis 1470-1474 gesto triremi Tragurinae praeerat et egregie pugnauit, deinde de bello eodem elegantes commentarios scripsit opus Coriolani, quod Petri Mocenici Imperatoris gesta intitulatur, primum prodiit in lucem Venetiis a. 1477. Alouisius autem noster, homo in litteris ac otiis educatus, ab anno 1470 Patauii studuit -- tempore mortis Riarii annos ergo plus minusue duodeuiginti natus erat -- et in eadem uniuersitate iuris utriusque doctor renuntiatus est. Anno 1488 canonicus Iadrensis factus, sequenti statim anno electus est episcopus Famaugustae, cum interea anno 1500 incertis de causis Alexander VI pontifex honore episcopali eum priuauit. A. 1503. a Iulio II pontifice tamen archiepiscopus Iadrensis nominatus, non multo post mortuus est, die 2. Martii anno 1504. Scripsit autem Alouisius iuuenilibus annis poemata aliquot Latina, quorum quattuor iam publici iuris facta sunt ; ea composita erant inter a. 1473 et 1482.3 Alia eius opuscula latere adhuc uidentur in codice Parisiensi BN Latin 8731. Textui neniae a Schedelio exscriptae mendae nonnullae irrepserant, quas in hac editione correximus et in apparatu indicauimus. Orthographia et ratione interpungendi hodie usitatis usi sumus paene in omnibus, praeter in ipso cardinalis S. Sixti nomine ubi Rhiarium pro Riario reliquimus. Paucis tantum in locis emendare ausi sumus cf. infra uu. 37, 66, 88, 93, 107, 120, 123.

Izvorni jezik
Lat

Znanstvena područja
Filologija

POVEZANOST RADA